شجره الصفصاف
صفصافه عاليه مفرعه فارده غصونها بشط النيل
جمعتنا تحتيها ابيض واسمر ...قصير وطويل
كل واحد سابح فى ملكوت بيفكر قصاد النيل
فيه اللى بيحب وهايم سهران يقول مواويل
عاشق حبيبه ..بيحلم بيه وهو صاحى وفى ظلام الليل
فيه اللى مجروح وجرحه نازف قالوله ميه النيل تشفى العليل
بيشكى للصفصافه غدر الحبيب ويحكى لها عن المواويل
والتانى شايل همه ف قلبه بيشكى للنيل
بيقوله يا نيل اغسل قلبى دى ميتك سلسبيل
وبنت سارحه ضفايرها سابحه بتحلم بكل جميل
بتحلم ببكره تعيشه من غيرخوف ولا تهليل
بتبص للصفصافه وتحلم بعش على غصنها من غير مايميل
وولد صغير واقف فى ظلها رامى سناره فى الميه
باصص للنيل وعايش كل حياته يحلم ببلطيه
تطلع تلعلط وترقص وتغنىله اغنيه
جميله يا صفصافه وحضنك مظللنا
جمعانا كلنا ومفرقنا تفكيرنا
احلامنا متغيره لكن ميتنا من نيلنا
احلم معانا يا نيل وانت بتجرى وادعيلنا
0 التعليقات:
إرسال تعليق