سكنتنى صورة
عمرك ما كنت فكرة
تراودنى فى الاشتياق

ولا يوم هتبقى ذكرى
 تصاحبنى فى الفراق

ولا بطل حكايه
 فى سهرايه
وسط السياق
***
لما عرفتك
 كان قلبى أخضر ونبضه 
 حانى
لا صدق كلام 
ولا غرام سمعه فى اغانى
 ولا عاش  الأمانى

الدنيا عنده 
موجه تروح بعيد
 وترجعله تانى
*****
على شط بحرى 
رسمت صورة 
من وحى حلمى

تفاصيلها دايبه 
فى لون غريب
 ماقابلش نظرى

سرحت فيها 
وجت معايا
 شاركتنى نبضى
****
غمضت عينى
 وشعرى سافر
 مع نسمه هايمه 
غازلته

لمست بأيدى خدى 
لقيت مس الملايكه
 سحرته

إحساسى راح 
غريق فى موجه
 أسرته
***
لقيت الصورة بتتجمع 
وتنقش تفاصيل ملامح
 ماعرفتها

وهمس غريب
 بيتردد بنغمه 
عمرى  فـ حياتى ماسمعتها

لابقيت أنا 
ولا نفس حسى
 لقيتنى فى حاله
 ما قابلتها

***
روحى وروحك 
وحاجات كتير
 وصوت جميل
 مجمعه..

لا بحر يفرق
 ولانسمه تبهج 
مخلوق جديد
 ليه مطرحه...

نوور
مش بس سكنه
 ده فرح 
 عشش و بقى منبته
***